SER CHIN DAN LEH BORUAK MAMAWH TE

Ser reng reng hian a than len nan temperature (khawlum leh vawh lam) mamawh bik a nei a, a thlangpuiin 25℃atang a 30℃ hi a boruak duh tawk chiah a ni a. Ser-te hian khawlum 38 º c chunglam a tuar theih loh bak ah 13ºc hnuailam a tuar thei lo tlangpui bawk a ni. Amaherawh chu ser thenkhat te chuan 50ºc thleng tuar thei an awm bakah 0ºc thleng khawvawt tuar thei pawh an awm tho a ni. Ser rah a hmin tan tirh lai vel a khua a lum lutuk chuan ser rawng a mawi thei lova, a eng hmin ser sawr ang kha awm lovin a hring deuh nghulh thin a ni. Khawlum lutuk vangin ser rah vun a duk thei bawk a ni. Khawvawt tuar theih lamah ser hrang hrang hi an in ang lo nual a. A khawvawt tuar theih loh dan in a hnuai a ser hrang hrang te hi kan rem khawm a nge- citron, lime, lemon, grapefruit, pummel, sweet orange, sour orange, mandarins, kumquats and trifoliate orange. Ti hian trifoliate orange te hi chuan khawvawt an tuar thei hle tih a hriat a, citron erawh chuan khawvawt a tuar thei lo hle thung a ni. Mahse ser eng chi pawh hi -9ºc ai a vawt ah chuan an thi vek mai thin a ni. Boruak hnawn lam (Relative Humidity) hi ser tan a pawimawh hle a, boruak a hnawn vak loh chuan ser rawng a mawi duh hle a, boruak a hnawn viau erawh chuan ser tui a tam duh bakah ser pil pawh a pan duh bik hle a ni. Amaherawh chu boruak hnawng lutuk ah chuan ser te hi rannung leh natna in an bawm duh hle a, ser a tha mawh hle a ni. Ser kung leh a zar te hian thli na lutuk a ngam lo em em a, a tul chuan thli danna siam a tha hle a ni. Ser hian ni eng a mamawh tam a, daihlim hnuai ah chuan ser rah a hlawk lo hle thin a ni. Ser te hi tui finriat hniam atang a 2000 meters thleng a sang hmunah chuan a chin theih vek a ni.

Ser te hi lei chi hrang hrang ah an chin theih deuh vek a, lei hraw deuh atang a lei ban deuh thlengin hlawh tling takin a chin theih a ni, Mahse tui a tling thei tur a ni lo. Lei a al tur a ni lo bawk. Lei al leh thur lam a a duh tawk chu pH 5 – 6 thleng hi a ni.

SER CHIN DAN TLANGPUI:

Ser huan hectare 1 ah hian ser kung 200 – 400 thleng an phun tlangpui thin a, amaherawh chu tunlai ah chuan hectare 1 ah kung 1111 lai an ching thei thin a ni. Lime leh lemon tan spacing (ser kung leh ser kung inkar) 4 x 4m an hmang a, Serthlum ah 5 x 5m, Sisu ah 6 x 6m, Ser tawkah 7 x 7m te an hmang tlangpui thin a ni.

Khur 50cm x 50cm a lian laih tur a ni a, bawng ek leitha pawlh bawk tur a ni ang.

Ser phun hun atan a tha ber chu fur ruah tui tlak tan tirh hi a ni.