CANCER ZIR CHIANG ANG!!

Cancer hian Mizoram min run nasa em em mai a, cancer vang a thihna a tamin kan la thih belh zel dawn pawh niin a lang. Cancer hi eng natna nge ni a, Cancer hi engvang a hluar em em nge a nih leh eng tia inven tur nge tih leh a enkawl dan I han zir ho dawn teh ang. Cancer chungchang hrethiam zawk tur chuan timur/cells hi enge a nih hriat chian a ngai hma sa a, hriat thiam loh pawhin awlsam tak a mitinin kan hriat theihna turin a awlsam thei ang ber a ziah han tum ila, kan mithiam te leh mi ril zawk te’n min lo hrethiam se, a awlsam thei ang ber a ziak a nih avangin Genetics term hrang hrang te phuai luai deuh a ka lo dah palh a nih pawhin min ngaidam a niang chu.

Cancer hi a nihna takah chuan timur/cell thanlenna leh inthlahpunna lam a dik lo a awm avang a lo awm a ni a, malaria lehna dang te ang lo takin bacteria, fungus etc. avang a lo awm a ni ve lo tihna a ni. Cancer hi inthlah chhawnna atang leh chemical exposure leh radiation exposer (chemical leh eng zung chak tak) avang a lo awm thin a ni. A chang chuan Cancer hi mihring cell/timur lo insiam danglam (mutation) avangin a lo awm ve bawk thin. Hetiang vang a cancer rawn insiam hi chu hriatthiam a harin mithiam-te pawhin hrilhfiah harsa an ti hle a, a chhan leh vang chiang tak a la hriat a ni lo.   

CANCER CHU ENGE?

Cancer hi timur cell inthlahpung chak lutuk leh thunun theih loh khawp a timur inthlah pung vak vak in a siam a ni. Kan timur/cell te hi darkar tin hian felfai tak leh awmze nei thlapin an inthlah pungin an thang lian ve thin a, vun timur (skin cell) te phei hi chu mihring dam chhungin an in thlah pungin an thang lian reng thin, a chhan chu mihring vun hi a hlui chu lo thiin a thar a thlak thleng reng a ngaih vang a ni. Cell/timur thenkhat erawh chu an inthlahpung ve vak lova, thluak (brain) leh hriatna thazam (nervous system) a timur/cell te hi chu mihring kan puitlin tawh chuan an in thlahpung tawh loin thlang lian tur a awm tawh lo thin a ni. A chung a kan sawi tak atang khian timur/cell te hian awm dan phung leh nih dan phung  awmze nei tak an nei tih ka hre mai em. Cancer cell te erawh hi chuan awm dan phung hlauhawm tak leh rapthlak tak an nei thung a ni.

BENIGN & MALIGNANT

Cancer hi chihnih ah an then a, chung te chu Benign Cancer leh Malignant Cancer te an ni. Benign cancer te awmze nei loin an in thlah pung ve vak tho a, mahse mihring taksa ah chhiatna an thlen ve lem lo. Malignant cancer te erawh chu inthlah pung vakin taksa hmun hrang hrang ah bu an khuar a, an bul hnai a taksa peng te an eichhe thin thung!!

Benign cancer te hi an inthlah pung muang zawk a, tumor/bawk mihring taksa ah an siam thin a, hetiang cancer hian mihringah chhiatna thlen lo mahse bawk/tumor lo thang zelin taksa pawimawh lai hnathawh a ti buai ve thei a, thisen zam bul maiah tumor/bawk hi a lo awm a, a than len viau tawh chuan thisen luang a ti buai ve thei a ni. Benign cancer te hi Doctor te thiamna hmangin awlsam takin a zai chhuah mai theih a, a then phei chu zaikher ngai loin a mahin a lo dam ve leh mai thin a ni, hlauhawm a ni hran vak lo. Mahse Benign cancer te hi kan ngaihsak vat loh chuan eng emaw vangin Malignant cancer-ah a chang thei a, chuvangin buaipui vat erawh a fin thlak hle mai.

Doctor-te thu sawi a hlauhawm ber pakhat chu “MALIGNANT” tih hi a ni! He cancer hi a hlauhawm em em ber mai. Chak tak leh awze mumal nei hauh lo in an thang vak a, an bul hnai a mihring taksa khawl pawimawh chu dimna nei miah loin an ei chhe miah miah mai zel a ni. Hei mak bakah hian an thlen chin apiangah bu thar an khuar zel a, cancer te chu mihring taksa hrang hrang ah an lo in zam darh a, cancer avangin taksa hmun dang dangah bawk a lo awm ta thin a ni, hei hi “Metastasis” an ti thin. Ruh, thin, lung leh thuakah an awm duh zual hle. Cancer timur/cell te hi mihring timur pangai nen chuan pian hmang leh hmelah an danglam hle a ni.  Malignant hi mithiam te chuan chi nga (5) ah an then a, chung te chu-

1.       Carcinomas- vun, hriatna thazam (nervous system) leh thawkna dawt cancer te an ni.

2.       Sarcomas- ruh leh tihrawl cancer.

3.       Leukemias- thisen cancer.

4.       Lymphomas- taksa invenna khawlah cancer an thlen.

5.       Myelomas- bone marrow/ thlingah cancer a thlen thin.

Kan taksa a timur cell te hi an awmna tur hmun theuh felfai tak a pin dan sak an ni a, chu tiang pindan sak tu chu “Basal lamina” an ti. Chung basal lamina te chu protein atang a siam niin cell leh cell inkarah pindan ang in a awm thin a ni. Metastatic cell te hian thil chikhat enzymes siam chhuakin chung timur/cell te ping dang tu basal lamina te chu an ei chhia a, cell leh cell te in ti buai lo a tha tak a hnathawk lai chu a ping dang tu basal lamina a ei chhiat avangin cancer chuan buaina a thlen a, chu tiang a ping dang tu a awm tawh loh avang chuan cancer cell te chu thisen ah te lutin hmun hran hran ah kua an hreuh thin a, an ko hreuhna hmun thar ah chuan inthlah pung in taksa hmun hran hran ah an in kulh ta thin a ni.

Basal lamina an tih chhiat avang a thil dang la awm chu cancer/tumor te chuan an mahni pual thisen zam an siam ve thin a, chu mi hming atan chuan “Angiogenesis” an ti bawk. Angiogenesis chu thisen zam thar siam a cancer cell, chaw (nutrients) leh oxygen chu thisen zam a thawn chhuah chu a ni ber mai. Cancer te chuan anmahni siam chhuah growth hormone te pawh cancer a nasat zawk theihnan an siam chhuak ve bawk thin.

ONCOGENES

Sawifiah dan vak ka thiam lo, Genes hi eng tin nge Mizo tawngin kan dah ang? Inthlahchhawn thil a ni a, DNA a mi, Chromosomes a hmun luah tu a ni ti mai ang! Oncogenes chu enge? “ON” tih chu ka hre vek a, current te kan ‘on’ a, computer te kan ‘on’ a, Gas thuk te pawh kan ‘on’ thin, kan hre thiam vek mai em? Chutiang chuan “oncogenes” chuan Genes te a “ON” ve a ni.  Genes pangai tak te pawh eng emaw vangin in siam dang lamin (mutation) Oncogenes ah an lo chang thin a ni. Oncogenes te chian chin tawk awm hauh loin timur/cell-te an “ON” a, an in thlah pung ta vak vak mai a ni. Oncogenes te hi cancer ah an inhnam hnawih ve a ni tih hi 1910 ah khan hriat chhuah a ni tawh! Mihring hrisel pangai hian a tlangpuiin a tlem berah proto-oncogenes hi 70 vel kan DNA ah kan nei theuh. Heng proto-oncogenes te hian mihring ah hna pawimawh tak an thawk theuh a, mihring tan an tang kai hle a, mahse mutation avangin “oncogenes” ah an lo chang thei a ni, oncogenes an nih tawh chuan mihring tan a tangkai tak thin kha mihring chhiatna thlentu Cancer siam tu an lo ni ta thin a ni. Oncogenes te hi CANCER siamtu lianber pakhat a ni tih ka hre ta awm e.

CANCER CHI HRANG TE

Hei mi hi sawi zau a chak awm, mahse ka peih tawh rih lo. A tul leh ni dangah

1.       Hereditary cancers- Heng cancer te hi inthlahchhawn atang a lo awm te an ni. Prostrate cancer, Hnute/ Breast cancer, Colon/ril cancer.

2.       Preventable/Inven theih Cancer-

a.       Lung cancer-  Lung cancer vei za a sawm khua (90%) te hi zialzu thin an ni.

b.      Mouth/Ka cancer- Sahdah/ khaini leh vaihlo hmuam thin te’n an vei nasa hle.

c.       Skin/ Vun Cancer- UV radiation avangin kan vei ber thin.