Technology thar nen Lo-ah feh ang!

Tunkar chu ATMA (Agriculture Technology Management Agency) hnuai-a Deputy Project Director hna MPSC kal tlang-in ka exam ve a. Thlahnih teh meuh mai in-ah ka inkhung char char a, engmah pawn lam boruak pawh hre lovin. Ka ni deuh chhuih rih a, thiante Inneihna, Chaw eikhawm leh thihna thlengin hre mumal lovin ka lo awm a, a zia lo tak zet. Min lo hrethiam hlawm teh u. Thlaleh tun ang hun velah chuan kan exam result pawh a chhuak ve tawh ang chu. Wish me luck...hehehe.

Thupui-ah lut tawh ang. Mi tam tak hian loneitu te hi ngawng deuh tur-ah leh changkang lo deuh tur-ah min ngai deuh ngawt niin ka hre deuh a. A rilru natthlak phian a. Tunlai Technology leh- Information Technology atang a Nano-Technology thleng hian kan nep bik lo a ni tih lan nan Android Application thenkhat ka duh zual deuh bik te kan tar lang ve teh ang.

1. Polaris Office:

He application / software hi awm lo se chuan Android OS hi ka lei ka ring lo reng reng. Microsoft Office hi android a hman theih turin an tichhuahna a la rei loh bakah OS version thar deuh ho tan chauh a hman theih avangin Microsoft Power Point, Word, PDF etc. thleng a hman ve duh chuan Polaris Office hi neih ngei ngei a ngai. Cloud a support avangin a awlsam em em a, ka document pawimawh neih ve ho chu he application hmang hian ka khawih ber thin.

2. Google Maps:

Delhi kan kal khan a pawimawh zia leh a tangkai zia ka hrethiam pha chauh. Mizoram-ah chuan Metropolitan khawpui lian tak tak te kan phak ve miau loh avangin hman na a nep deuh a, mahse mahni huan leh ram vel en nan a tangkai em em a, khawi chin nge ka huan tih pawh a hmuh zung zung theih. Ram kal dawn in kan ram kalna tur chin en nan a tha hle a. Sangha man tur a kal phei chuan en hmasak ngei ngei chi, tih fuh phei chuan Satellite map atang hian sangha phe nuaih nuaih a zuk hmuh theih :D .

3. AccuWeather Widgets: 

Khawchin enna (Weather Forecasting)a ni deuh ber a. Naktuk-ah ruah a sur dawn em? Kar leh ah khua a tha dawn em? Naktuk khua a lum lutuk a ngem? Chhum a zing dawn nge ni a sa hle dawn? Khawlum zawng Degree engzat nge? Fahrenheit nge Celsius in? A tam mai. Hetiang zawhna hi loneitu tan hriat a pawimawh em em a. Naktuk khua a that loh chuan ka feh lo mai teh ang tih ngawt ngai lovin khaw chin a en vek theih avangin Lo nei tute hian kan hmang tang kai em em reng mai fo dawn a nih hi. 

4. Google Play Newsstand: 

He thil zet hi chu a va han tha tak em! Khawvel chanchin thar zawng zawng hi he application vang hian hne hlei hlui khawpin a hriat theih a ni. Jayallalitha chungchang a chanchin thar ziak awm zawng zawng kha i hriat duh chuan Newsstand hmang hian zawng khawm la, awlsam tak a ni. Research tih nan pawhin a hman tlak hial ang chu mawle. Khawvel chanchin thar puang tu lar tak tak - CCN, BBC, India Today, CNN (IBN), The Telegraph...sawi sen loh thleng in an awm vek a. News hriat duh bik pawh a thlurbing theih. Entirnan, kei pawhin Horticulture leh Agriculture News chauh thlurbing ka duh avangin Category hran ka siam a. Horticulture emaw Agriculture a News thar Internet a awm hrim hrim, khawvel khawi hmun a mi pawh kha he software te reuh hian ka chhiar tur in min lo fawmkhawm sak zung zung mai a ni.

5. Google Drive:

He thil thung hi chu Cloud kan tih ang type hi a ni a. Google Drive hian Sheets, Docs leh Slides a ken tel avangin Document siam nan, Edit nan leh dah that nan a tha em em a ni. Google Drive hian ka Document zawng zawng kha Cloud-ah min vawn him sak a. Ka phone emaw ka tablet hi miin ru daih mahse emaw lo ti chhe palh ta pawh ni mah ila ka Document pawimawh zawng zawng kha chu him takin ka hmu let leh thei dawn tihna a nih ber mai chu. Tangkai tak a ni. Ba-bu ah a hman chi viau ang :D .

6. Bible:

Kristian ka nih avangin ka thlarau in a chaw ei tur Pathian thu nung Bible atangin ka mamawh a. Bible (lehkhabu) ken kual luk luk hi a rem chang lo. Chuvangin a software an rawn siam chhuak a, a rem chang hle. He sofware thatna em em chu Bible version hrang hrang Good News Bible, King James Version Amplified Bible, Common English Bible, Contemporary English Version...a la tam lutuk...heng ho zawng zawng hi a awm kim vek. Chu mai a la ni lo, ka Bible chang duhlai deuh te kan chhin chhiah zung zung thei a. Bible kan chhiar lai a kan rilru a thilawm kan ziah zung zung theih na tur te, midang hnen a chhiar ve tur a kan duh te kha Facebook emaw Twitter emaw-ah kan va thawn zung zung thei bawk a. A la tawp mai lo cheu, Bible hi ka chhiar peih lo, ka mit a na pawh i ti a ni mai thei..i Ear phone kha vuah la, he software hian a lo chhiar sak zung zung thei che. Chubak-ah Isua Film leh eng ilo rinna ti nghet thei thil en tur video pawh a fawm tel teuh mai.

7. musiXmach:

Hla thu (Lyrics) enna a ni deuh ber mai. A software hian i drive a i hla neih ho kha a zuk endik a nga. Internet kal tlangin Lyrics a zawn hmuh sak zung zung che a nga. Ring deuh deuh in i lo zai pui ve dawn nia. Mizo hla ah chuan a hman tlak loh.

8. PocketBook:

Tunlai-ah chuan Lehkhabu pawh Tablet ah emaw phone ah a chhiar vek theih tawh. Chutiang chhiar nan chuan he software hi a tangkai hle. PDF, Doc emaw eng file pawh a hawng thei deuh vek. A thatna leh em em chu lehkhabu ang deuh tak tak hian keu theih turin an siam a, lehkhabu tak tak kan chhiar a kan keu ang feeling hi min pe a, a nuam reuh khawp mai.

9. TuneIn Radio:

Internet Radio Stations ho zawng zawng chu a man kim deuh vek ang. Chanchin thar, Music, Drama, etc. radio a awm ang chi kha chu a ngaihthlak theih vek. Rock Music, Christian, Muslim, Reggae, Heavy Metal, Pop, Rap, Soul....i music duh zawng genre kha chu a kim vek ang.

10. Remote Desktop: 

Microsoft ho siam a ni a. I android emaw iOS atang khan i computer i thunun theihna tur a siam a ni. I android phone atang khan i computer a mi i file duh ang ang i hawng thei a, i computer a hla te, Movies te, music video te, Microsoft word te, Photoshop te......engkim mai, i computer a awm zawng zawng kha he application hmang hian i khawih thei vek. A changkang em em a ni tawp mai a ni. Thumps up for Microsoft.

11. Dropbox: 

He software hian phone memory a thlalak kan hmeh tawh leh ka dahthat sa te kha awlsam te a a bo mai lohnan Internet kal tlangin hmun him ah min dah that sak vek a. E-mail hmang-in account siam a, khawih theih mai in he software hi an siam reuh a. Chung kan thlalak zawng zawng chu phone keng kher lo pawhin hmun dang atang pawhin a khawih zung zung theih tawh a ni. A awlsam in a tangkai em em a ni.

Heng ho bakah hian adang tam tak pawh a la awm a, Youtube, Whatsapp, Playbook, IFTTT, Paper Artist,UC Browser, uTorrent, Sound Cloud tih vel hi chu kan hriat than a nih hlawm avangin sawi vek lo mai ang. A chung a ka ziah tak ho te khi kei chuan ka hmang tangkai em em vek a. Nang i lo hmang ve chhin hlawm tawh em?