Anthocyanin leh Tunlai Sumdawnna

Tunlai hian thlai atang a damdawi siam company chi hrang hrangin sumdawn nan an hmang nasa em em mai a. Entirnan, a bikin heng - IMC, Viva, Magnessa leh green tea te hmang a sumdawnna hi a lar thar hluai mai. Mihring tan a thatna hmachhuan in sumdawnna nen kaih kawpin man to tak takin an product an zuar chhuak thin. Food Supliments ang te, Herbal damdawi ang te leh Ayurvedic emaw Homeopathic damdawi te ang a zawrh chhuah a ni tlangpui thin. Heng an product hrang hrang a an chawi lar pakhat chu Anthocyanin emaw Antioxidants hi a ni awm e. Mihring tana hrisel tak a nih piah lamah taksa a bawlhhlawh leh toxic compounds te paih chhuakin mihring taksa a vawng thianghlim a, natna hrang hrangti damtu ni chiah lovin natna insiam tur ven thei tu a ni thung! Mahse heng product man to tak tak a kan lei te hi a tul chiah em? Kan pawisa kan seng thlawn mai mai em ni tih te hi hriat chian tumin Anthocyanin leh Antixidants te hi i han zir chiang teh ang.

Source: Google

Source: Google

Anthocyanin chu enge ni?

Anthocyanin hi Greek tawng atang a lak chhawn a ni a, 'Anthos' hi 'Pangpar' tihna niin 'Kyaneos' hi 'Pawl' (Blue color) tihna niin hemi thumal pahnih kaih kawp a lak chhawn a ni. Theirah leh thlai rawng pawl te, rawng sen leh rawng eng ang chi reng reng hi Anthocyanin vang a ni thin. Thlaiah a bik takin a awm thin a, thlai timur (cell) chhung a kawrawng (voucles) chhungah hian anthocyanin kan tihhi a awm thin a. Pangpar rawng pawl te, rawng sen duk te, rawng eng thleng hian anthocyanin vang a rawng nei an ni. Thlasik a thingkung leh thlai hnah a lo tlak dawn a rawng hring atang a senduk lam rawng a neihna chhan pawh hi hei vang tho hi a ni. 

Source: Google

Anthocyanin hi antioxidants tha tak mai a ni a. Antioxidants mihring taksa chhung a free radicals kan tih mai, oxygen particles te'n taksa timur (cell) an ti chhetu vengtu tha tak mai a ni a. Oxygen hi kan taksa mamawh nimahse free radicals a nih tawh chuan chem hriam tawn ang mai in kan taksa tan a hlauhawm ve thin a ni. Taksa a chauh lutuk emaw, rilru hah vangte in taksa ah free radicals hi a insiam thin a. Heng hian cancer atanga lung natna thlengin kan taksaah natna a thlen thei a ni. He tiang free radicals kan tih te veng a, kan timur leh taksa an tih chhiat loh nan antioxidants te hi a pawimawh em em mai a ni. 

American Society for Nutrition chuan Anthocyanin hi Indopui Pahnihna hunlai atang tawhin natna benvawn enkawl nan an lo hman fo tawh thu a ziak a, lungnatna te, nerve lam chak lo te, zunthlum leh thau chhia in chhek khawl thei tur te a veng niin an sawi. Mahse taksa in Vitamin te angin ngei ngeiin a mamawh hran lova, Anthocyanin tel lo pawhin mihring taksa hi a awm thei a; taksa thianghlim nan leh hriselna belhchhan nan erawh chuan thil tul tak leh tha tak a ni thung. 

Anthocyanin chu khawi atangin nge kan hmuh?

Sawi tawh ang khian anthocyanin te hi kan thlai ei ah hian Pathianin a dahsa vek a. University of Podlisie (Poland) chuan heng thlai hrang hrang - Apple, Grape, Balhla, Strawberry, Plum, bawkbawn, Behlawi rah, zikhlum duk chi, Lettuce, broccoli etc ah te hian kan takin kan mamawh khawp antioxidants/anthocyanin a awmin heng thlai te hian tam tham takin a pai niin a sawi. Anthocyanin hi thlai atangin ka ei tlangpui a. Red wine ah hian tam tham tak aawm bawk niin Galvano chuan 2004 khan a ziak. Anthocyanin hi a tlangpuiin 218 mg vel hi mihringin nikhatah kan ei tlangpui thin a, hei hian mihringin ka mamawh a phuhru tawk viau niin a ngaih theih. Japan a Masao Yamamoto te'n an zirchianna ah chuan nitin mihringin 29mg vel tal kan eiin a tel turin kan mamawh niin an sawi. 

Source: Google

                                      Chuvang chuan anthocyanin hi mihringin kan mamawh tam em em lova, chuvang chuan to deuh deuh a company product te kan lei hi pawisa sen thlawnna a ni ve thei a ni. Anthocyanin hi sawi tawh angin mihring in kan mamawh teh meuh mai a, mahsecompany te'n he mi kan mamawhna leh taksa tan a thatna changchawi a, sumdawnna nen a kaih kawp a to tak tak a min lei tir hi pawisa sen thlawnna chikhat a ni thei a. Awlsam te hi thlaiah kan taksa mamawh zat kan hmuh theih laiin fakmawi chawp ngai leh engtiang chiah a siam nge tih hriat loh company product to tak tak kan lei thin hi chu ngaihtuah a ti thui khawp mai. Chumai bakah heng company tam tak siamah hian anthocyanin engzat chiah nge tel tih hriat theih lohin emaw hriat harsa takin label an siam thin a. Laboratory a uluk tak a en a nih loh phei chuan an fak em em hian mihringin kan thatpui kher lo thei bawk. Sumdawng company te'n "Antioxidants" emaw "Anthocyanin" hmanga an product an rawn zawrh leh che chuan uluk takin lo ngaihtuah ve thin ang che.